ദോഹ: ദോഹയില്‍ നടന്ന ഫിഫ ലോകകപ്പ് യോഗ്യതാ മത്സരത്തില്‍ കരുത്തരായ ഉസ്ബെക്കിസ്ഥാനെ 3-2 ന് പരാജയപ്പെടുത്തി ഖത്തര്‍ അടുത്ത ഘട്ടത്തിലേക്ക് ചുവടുറപ്പിച്ചു. ഇരു വിഭാഗവും പൊരുതിക്കളിച്ച മത്സരത്തില്‍ അവസാന നിമിഷം ലൂക്കാസ് മെന്‍ഡസ് ഖത്തറിനായി നേടിയ നിര്‍ണായക ഗോളാണ് ഖത്തറിനെ വിജയത്തിലേക്ക് നയിച്ചത്. 2-2 എന്ന ഗോള്‍ നിലയില്‍ സമനിലയില്‍ അവസാനിക്കാനിരുന്ന മത്സരത്തില്‍ സ്റ്റോപ്പേജ് ടൈമിന്റെ 12-ാം മിനിറ്റില്‍ മെന്‍ഡസ് തന്റെ നിര്‍ണായക സ്ട്രൈക്കിലൂടെ ഖത്തറിന് വിജയം സമ്മാനിക്കുകയായിരുന്നു.

അക്രം അഫീഫിന്റെ രണ്ട് അസിസ്റ്റുകളോടെ അല്‍മോസ് അലി 25ാം മിനുട്ടിലും 41ാം മിനുട്ടിലും കളിയുടെ ആദ്യ പകുതിയില്‍ തന്നെ ഇരട്ട ഗോളുകള്‍ ഉസ്‌ബെക് വലയില്‍ എത്തിച്ചിരുന്നു. എന്നാല്‍ രണ്ടാം പകുതിയില്‍ രണ്ട് മറുപടി ഗോളുകളിലൂടെ ഉസ്ബെക്കിസ്ഥാന്‍ രണ്ടു തവണ ഏഷ്യന്‍ ചാമ്പ്യന്മാരായ ഖത്തറിനെ വിറപ്പിക്കുകയായിരുന്നു.

കരുത്തരായ ഉസ്ബക്കിസ്ഥാനെ വീഴ്ത്തിയതോടെ ഖത്തറിന്റെ ലോകകപ്പ് പ്രതീക്ഷകള്‍ക്ക് കൂടുതല്‍ തെളിച്ചമുണ്ടാവും .അടുത്ത ചൊവ്വാഴ്ച അബുദാബിയില്‍ നടക്കുന്ന മത്സരത്തില്‍ ഖത്തര്‍ യു.എ.ഇയെ നേരിടും.