ജുബൈല്‍: ജനസേവനത്തിന്റെയും സാമൂഹ്യനീതിയുടെയും അടിസ്ഥാന ശിലകളിലൂന്നിയ പ്രവര്‍ത്തനങ്ങളാണ് പ്രവാസി വെല്‍ഫെയര്‍ നടത്തുന്നതെന്ന് പ്രവാസി വെല്‍ഫെയര്‍ കിഴക്കന്‍ പ്രവിശ്യാ പ്രസിഡന്റ് ഷബീര്‍ ചാത്തമംഗലം. സൗദിയില്‍ പ്രവാസി വെല്‍ഫെയറിന്റെ പത്താം വാര്‍ഷികത്തോട് അനുബന്ധിച്ച് പ്രവാസി വെല്‍ഫെയര്‍ ജുബൈല്‍ ഘടകം സംഘടിപ്പിച്ച 'സ്നേഹ സംഗമം 2024' ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സാമൂഹ്യനീതിക്കായി പ്രവര്‍ത്തിക്കുന്ന വെല്‍ഫെയര്‍ പാര്‍ട്ടിയുടെ പോഷക സംഘടന എന്ന നിലയില്‍ പ്രവാസി സമൂഹത്തിന്റെ പ്രശ്‌നങ്ങളില്‍ ഇടപെട്ട് സമഗ്രമായ പ്രവര്‍ത്തനമാണ് പ്രവാസി വെല്‍ഫെയര്‍ നടത്തുന്നതെന്ന് അദ്ദേഹം പറഞ്ഞു. പ്രവാസി വെല്‍ഫെയറിന്റെ പത്താം വാര്‍ഷികവുമായി ബന്ധപ്പെട്ട് സൗദിയിലും മറ്റു ജി.സി.സി രാജ്യങ്ങളിലും വിവിധ പരിപാടികള്‍ അരങ്ങേറുകയാണ്. കിഴക്കന്‍ പ്രവിശ്യയിലെ പ്രമുഖ സാമൂഹ്യ പ്രവര്‍ത്തകരും പ്രവാസി വെല്‍ഫെയറിന്റെ ജനസേവന വിഭാഗം കണ്‍വീനര്‍മാരുമായ സൈഫുദ്ധീന്‍ പൊറ്റശ്ശേരിയെയും സലിം ആലപ്പുഴയെയും അദ്ദേഹം പ്രത്യേകം അഭിനന്ദിച്ചു.
പരിപാടിയോട് അനുബന്ധിച്ച് പ്രവാസി വെല്‍ഫെയര്‍ ജുബൈല്‍ വനിതാ കമ്മിറ്റിയെ പ്രവാസി വെല്‍ഫെയര്‍ കിഴക്കന്‍ പ്രവിശ്യാ ജനറല്‍ സെക്രട്ടറി സുനില സലിം ഔദ്യോഗികമായി പ്രഖ്യാപിച്ചു. ഫാസില റിയാസ് (പ്രസിഡന്റ്), സാറാ ഭായ് ടീച്ചര്‍ (വൈ.പ്രസിഡന്റ്), ഷബിന ജബീര്‍ (സെക്രട്ടറി), ഉമൈമ നബീല്‍ (ജോ.സെക്രട്ടറി) എന്നിവരാണ് പുതിയ കമ്മിറ്റി ഭാരവാഹികള്‍.
പ്രവാസികള്‍ നേരിടുന്ന മാനസിക സമ്മര്‍ദ്ദങ്ങള്‍ക്കിടയിലും ജീവിത വിജയവും സന്തോഷകരമായ ജീവിതവും എത്തിപ്പിടിക്കാനുള്ള മാര്‍ഗരേഖ 'മറക്കാം സമ്മര്‍ദ്ദം, നിറക്കാം സന്തോഷം' എന്ന തലക്കെട്ടില്‍ നടത്തിയ സെഷനിലൂടെ ലൈഫ് കോച്ചും പേഴ്‌സണാലിറ്റി ട്രെയ്‌നറുമായ ഡി.ടി.എം.സഫയര്‍ മുഹമ്മദ് സദസ്സിനോട് പങ്കുവെച്ചു.
തുടര്‍ന്ന് കുട്ടികള്‍ അവതരിപ്പിച്ച സംഘ നൃത്തങ്ങള്‍, ഗാനങ്ങള്‍, അറബിക് ഡാന്‍സ്, ഒപ്പന എന്നിവ സദസ്സിനെ ഇളക്കി മറിച്ചു. ഐസ മര്‍യം, കിഴക്കന്‍ മേഖലയിലെ പ്രമുഖ ഗായകരായ കരീം മുവാറ്റുപുഴ, സഹീര്‍ കാലിക്കറ്റ് എന്നിവര്‍ ഗാനങ്ങള്‍ ആലപിച്ചു.
പ്രവാസി വെല്‍ഫെയര്‍ ജുബൈല്‍ ഘടകം പ്രസിഡന്റ് ശിഹാബ് മങ്ങാടന്‍ അധ്യക്ഷത വഹിച്ചു. ഇന്റര്‍നാഷണല്‍ ഇന്ത്യന്‍ സ്‌കൂള്‍ ജുബൈല്‍ മലയാള വിഭാഗം മേധാവി എന്‍.സനില്‍ കുമാര്‍, ജുബൈല്‍ മലയാളി സമാജം ജനറല്‍ സെക്രട്ടറി ബൈജു അഞ്ചല്‍ എന്നിവര്‍ ആശംസകള്‍ നേര്‍ന്നു. പ്രവാസി വെല്‍ഫെയര്‍ ഇ.പി .സി അംഗം ബിജു പൂതക്കുളം, തനിമ സാംസ്‌കാരിക വേദി പ്രസിഡന്റ് ഡോ.ജൗഷീദ്, യൂത്ത് ഇന്ത്യ ജുബൈല്‍ ചാപ്റ്റര്‍ പ്രസിഡന്റ് അബ്ദുല്ല സഈദ് എന്നിവര്‍ അതിഥികളായിരുന്നു.
അബ്ദുല്‍ കരീം ആലുവ അവതാരകനായിരുന്നു. പ്രോഗ്രാം കണ്‍വീനര്‍ റിയാസ് മണക്കാട് സ്വാഗതവും, പ്രവാസി വെല്‍ഫെയര്‍ ജുബൈല്‍ ജനറല്‍ സെക്രട്ടറി നിയാസ് നാരകത്ത് നന്ദിയും പറഞ്ഞു.
ഫോട്ടോ: പ്രവാസി വെല്‍ഫെയര്‍ ജുബൈല്‍ റീജിയണല്‍ കമ്മിറ്റി സംഘടിപ്പിച്ച സ്നേഹ സംഗമത്തില്‍ ഈസ്റ്റേണ്‍ പ്രൊവിന്‍സ് ജനറല്‍ സെക്രട്ടറി സുനില സലീം സംസാരിക്കുന്നു.
Related News
